الشاعر ألمبدع فـيـصــل بــدر
يكتب....
((( بيت جدى )))
آه
وفاضلك شهر يا عبتواب وتروح الجيش
وهتنسى المنصوره وشوارعها
وهتنسى دروبها وأريافها
وهتنسى البت اللى كتبتلها الأشعار
خِلِصِت أيام الجنه
خِلِصِت أمتع أيام العمر
وهتبدأ أيام النار
كان حبلك على ضهرك ياد
تاكل على كيفك
تلبس على كيفك
تسهر وتنام بمزاجك
فى الليل
بتمثل ويَّا الشبَّان
والعصر بتكتُب أشعار
والقلب يا عبتواب
من غير باب
قلبك مفتوح للكل
اللى بيدخل معدوم الأهل
بيلاقى فى عبتواب
أهل وأصحاب
واللى بيدخل كارِه ناسه
بيلاقى فى قلبك أحباب
حتى اللى يعادى.. واللى يقاسى
واللى يجيب سيرتك بالخير
أو بالشر
داخل على قلب مالوش باب
من غير صاحب
زى أما يكون جامع
مفتوح ليل ونهار
ممكن يدخل واحد مُـلْحِد
ممكن يدخل واحد
مش راغب طاعه
داخل يقضيها هِزار فى هِزار
عارف كل دا ليه بس يا عبتواب
علشانك متربى فى بيت
من غير باب
يدخله أيها جار
أيها سائل
أيها واحد
حتى ان كان غير الأصحاب
جايز دا غباء
ولا يكونش عشان جدك
كان مِطْياب
شــاعر القريه
فـيـصــل بــدر
ليست هناك تعليقات:
إرسال تعليق